မြန်မာနိုင်ငံ၏ အဆိပ်သင့်နေသော တောင်များ

တရုတ်နိုင်ငံသည် လျှပ်စစ်ကားများ နှင့် လေအားလျှပ်စစ်ထုတ်လုပ်သည့် လေရဟတ်များ တည်ဆောက်ရန် လိုအပ်သော သတ္တုများဖြစ်သည့် လေးလံသော မြေရှားသတ္တုဒြပ်စင်များနှင့်ပတ်သက်၍ ကမ္ဘာလုံးဆိုင်ရာ ထုတ်လုပ်မှုများကို ကာလရှည်ကြာ လွှမ်းမိုးထားခဲ့သည်။ ကျွန်ုပ်တို့အနေဖြင့် ရာသီဥတုဆိုင်ရာ ပန်းတိုင်များကို ကိုက်ညီရန် အရှိန်အဟုန်ဖြင့် လုပ်ဆောင်လာသည်နှင့်အမျှ အဆိုပါ ထုတ်ကုန်များအတွက် လိုအပ်ချက်သည် တဟုန်ထိုး မြင့်တက်လာခဲ့သည်။ သို့ရာတွင် ထုတ်လုပ်ရေးလမ်းကြောင်း၏ အရင်းအမြစ်တွင် ပြဿနာတစ်ရပ် ရှိနေပါသည်။

လေးလံသော မြေရှားသတ္တုဒြပ်စင်များ ထုတ်ယူရန် အသုံးပြုသည့် လုပ်ငန်းစဉ်များသည် ညစ်ညမ်းမှုများ မြင့်မားစွာဖြစ်စေပြီး တောတောင်ရေမြေများကို ပျက်စီးစေကာ မြစ်ချောင်းများတစ်လျှောက် အဆိပ်များ စီးဆင်းသွားစေသည်။ လွန်ခဲ့သည့် ဆယ်စုနှစ်အတွင်း တရုတ်နိုင်ငံရှိ တူးဖော်မှုများ၏ သဘာဝပတ်ဝန်းကျင် ဆိုင်ရာ ဆုံးရှုံးမှုများနှင့်ပတ်သက်၍ စိုးရိမ်ပူပန်မှုများ ကြီးထွားလာသည်နှင့်အမျှ တရုတ်ပြည်တွင်းရှိ တူးဖော်မှု များကို ပိုမို၍ ပိတ်သိမ်းလာခဲ့သည်။ သို့တိုင် ကမ္ဘာလုံးဆိုင်ရာ လိုအပ်ချက်သည် လျင်မြန်စွာ မြင့်တက်လာလျက် ရှိနေပြီး တရုတ်နိုင်ငံသည် ကမ္ဘာပေါ်ရှိ အကြီးမားဆုံး ထုတ်လုပ်သူ ဖြစ်နေဆဲဖြစ်သည်။

သို့ရာတွင် ယခုအခါတွင် ၎င်း၏ နိုင်ငံအတွင်း သတ္တုတွင်းများစွာကို ပိတ်သိမ်းခဲ့ပြီးဖြစ်ရာ တရုတ်နိုင်ငံသည် အဆိုပါ သတ္တုများကို မည်သည့်နေရာမှ ရရှိနေသနည်း?

Global Witness မှလုပ်ဆောင်ခဲ့သည့် ခြောက်လကြာ စုံစမ်းဖော်ထုတ်မှုတစ်ခု၌ ဤသို့ အဆိပ် အတောက်များစွာ ဖြစ်စေသည့် လုပ်ငန်းအား တရုတ်နယ်စပ်မှတဆင့် မြန်မာနိုင်ငံအတွင်း လုပ်ကိုင်၊ ရယူနေမှုကို ခြေရာခံထားပါသည်။

လေးလံသော မြေရှားသတ္တုဒြပ်စင်များ တူးဖော်မှုသည် နှစ်အနည်းငယ်အတွင်း၌ပင် အလွန်လျင်မြန်စွာ တဟုန်ထိုး တိုးပွားလာခဲ့ပြီး ကချင်အထူးဒေသ ၁ ဟုခေါ်သော မြန်မာနိုင်ငံ၏ တောင်ထူထပ်သည့် အဆိုပါ ဒေသသည် ကမ္ဘာပေါ်တွင် မြေရှားသတ္တုဒြပ်စင် အများဆုံး ထုတ်လုပ်ရာနေရာတစ်ခု ဖြစ်လာခဲ့သည်။ ယင်းသည် မြန်မာနိုင်ငံ၏ ရက်စက်ကြမ်းကြုတ်သည့် စစ်အစိုးရနှင့် ဆက်နွယ်နေသည့် ပြည်သူ့စစ်များမှ ထိန်းချုပ်ထားသော တစ်စိတ်တစ်ပိုင်း ကိုယ်ပိုင်အုပ်ချုပ်ခွင့်ရ နယ်မြေတစ်ခုဖြစ်သည်။ မြေရှားသတ္တု တူးဖော်ခြင်းသည် မြန်မာနိုင်ငံ၏ ဥပဒေများအရ တရားမဝင်ဘဲ သဘောတရားအားဖြင့် ရှိသည်ဆိုရုံမျှသာ ဖြစ်သည်။

သို့တိုင် နိုင်ငံတကာကုမ္ပဏီများမှ ထုတ်လုပ်သည့် ထုတ်ကုန်များအတွက် ကမ္ဘာလုံးဆိုင်ရာ ဝယ်လိုအားကြောင့် ဤသို့ ကမ္ဘာပေါ်ရှိ ဝေးလံပြီး ဥပဒေမဲ့နေသည့် ဒေသတစ်ခုအတွင်း ပိုမိုဆိုးရွားလာစေလျက်ရှိသည့် ထိခိုက်ပျက်စီးမှုများသည် ယခုအခါတွင် မိမိတို့၏ မြေယာ များကို အသက်စွန့်ကာကွယ်နေကြသည့် ပြည်သူလူထုများအတွက် နာကျင်ဖွယ် လက်တွေ့အခြေအနေပင် ဖြစ်သည်။