MIWA MUNG JARIT HPUN HPAGA PAT AI LAM — MYEN MUNG DINGDUNG DAW NA MAILUNG NSIN HPAGA HPUNGDIM HPANG WA SAI KUN?
24th January, 2006, Bangkok Maigan Shihtawn Masha Ginra hta galaw ai sang lang dan zuphpawng [1]
Lai wa sai shata 4 daram, Myen mung hte Miwa mung lamu ga jarit mailung hpaga ganoi hkring mat ai.
Lai wa sai October shata hta Global Witness [2] gaw mungkan ntsa hpung kawa hkum dik dingdung Myen mung na Hpun ni Miwa mung de htaw shalai ai lam yawm mat ai hpe shapraw shadan dan ai. Shaning shagu US $ Wan 250 manu re ai hpun hpaga ga shalai nga ai. Global Witness [3] tsun ai hte maren nga yang, Miwa mung de htaw shalai ai mailung hpaga a 95% gaw tara n shang ai hku shalai nga ai hpe chye lu ai.
Ndai shata praw 5 Global Witness sawk sagawn tawn ai hte maren nga yang mailung hpaga ma ja e grau yawm wa na lam nga ai. Jinghpaw mungdaw kata e mailung hpaga ga ai lam hte Miwa hkran de mailung shalai ai lam hpe Myen Asuya hku nna pat hkum shing dang nga ai hpe mu lu ai. Ya hte na shata ni laman e, Myen Asuya up ai lamu ga jarit kata hkan na hpun pyen jak ni hkring mat ai daram rai nga ai. Gap hkat jahkring tawn ai Jinghpaw laknak lang hpung ni a ginra hkan mung mailung hpaga grai yawm mat ai [4].
Global Witness hpung na Mike Davis tsun ai hte maren nga yang, Mailung hpaga hpung ni shaning na na lagu galaw sha ngut nna Myen Asuya hte Miwa Asuya ning dang nga ai lapran na, ya she mailung hpaga hpe pat ai gaw aten pyi garai hpang hkrat sai lam chye lu ai. Ndai hku galaw ai gaw aten galu hku nna shing-ra nhprang sutgan ni hpe kyem mazing na lam npawt rai sai kun? Shing nrai, manu daw n dang ai nhprang sut rai ni hpe magra jum da ai lata hpe gan ashun ai sha rai kun? [5]
Byin masa gaw grai naw nhtan shai nga ai. Grau dam lada ai hku lam hpaw na hpe hkap tau la ai hku nna, Myen Asuya Nam Kawn Dap hkringmang rung gaw Miwa mung de n tara ai hku hpun hpaga ga ai lam nga ai ngu nna yin la na ai [6]. Global Witness gaw myi hte chyaw mu ai sakse ni a shiga hte maren, Miwa mung na Mailung hpaga lauban ni Myen mung dingdung de bai yan shang wa ai lam chye lu ai. Mailung htaw ai mawdaw kaba ni mung bai yan shang wa sai.
Ndai chye na yak ai mabyin hpe maram yu yang, Mailung hpaga hpe gan pat hkum ai lam gaw sut nhprang mailung maling ni hpe jahten ai bungli shayawm na yaw shada ai hta grau nna gap hkat jahkring ai hpung ni a mailung hpaga kaw na shang gumhpraw lam hpe pat ai mahtang yaw shada ai hpe mu mada lu ai. Global Witness hku nna Myen Asuya hpe ndai lam sang lang shangun da ai. Bai galai kapa nmai ai nhprang sut rai ni hpe pagawn para jahtum kau ai amu hta shamyet shanat ai lam hpe shayawm ai masing hte karum katum ai hpe dingbai dingla nmai jaw ai. Hpyen Asuya gaw buga masha ni a matu aten galu akyu hte rawt jat lam hpe ja ja wa ap nawng shakut shaja ra ai.
Dai hte maren, Miwa Asuya mung Myen mung kata na hpun maling ni htum mat ma shangun ai Miwa hpaga hpung ni a ntsa e kaning re ai shara kaw tsap nna ra ai lam galaw na naw masat ra nga ai. [7]
Mike Davis tsun ai gaw, "Miwa mung hku nna ndai Sinpraw dan ginra hta woi ning shawng ai shara la na shakut nga ai hte maren, htingbu mungdan ni hte ngwi pyaw simsa ai hku rau jawm nga na myit shatawng da ai hpe madun dan na gaw ndai ahkaw ahkrang kaba rai nna ai'' nga ai.
"Myen mung hkran de na tara n shang ai hpun hpaga hpe jum tek na matu gaw, Miwa hkran de na shamu shamawt ai magam bungli hte bung pre yang she mai byin na re. Miwa Asuya hku nna shi a mungmasha ni a akyu a matu Myen mung na hpun maling ni hpe kran mazing ai hta garum nna mungkan mungdan ni e kaja ai ngu masat ai hkrum na shakut nga ai. Ndai ya na ahkaw ahkrang hpe magra la na matu shadut jahkat dat ga ai,'' nga ai.
Shiga dip shabra dap a matu: Global Witness +66 571 499 21 (Thailand) +44 207 561 6396 ( London )
Editor a matu matsing hpa:
(1) Shiga dap sanglang dan ai zuphpawng de yawng sa du mai ai. Hkringdat: FCCT, Penthouse, Maneeya Center, 518/5 Ploenchit Road, Patumvan, Bangkok.
(2) Global Witness gaw England mungdan kaw rudi tawn nna, shing-ra nhprang sut rai ni hpe jahten sharun, lahpawt kau ai, lam ni hpe madung dat nna amu galaw nga ai. Kata lam azin ayang chye mayu yang: www.globalwitness.org hpe hpaw hti u.
(3) Dai hta jan nna chye mayu yang : Ending the destruction of Burma's Northern Frontier Forests, published October 2005, www.globalwitness.org/reports?indexphp?section=burma
(4) Myen Hpyen Asuya gaw shaning 40 jan dinghku majan gasat lai wa sai hpang 1980 jan ning jahtum daw hte 1990 jan ning nnan daw hta laknak lang ai hpyen hpung 22 hte gap hkat jahkring ai myit hkrum lam lu galaw la ma ai. Myen mung dingdung daw de gaw KIO/KIA gaw kaba dik gap hkat jahkring hpung ni rai nga ma ai.
(5) Mailung kran ai hpaga hpe gaw Dingdung daw Myen Hpyendap Jaubu Ohn Myint a ading tawk matsun aming hte pat jahkring dat ai rai nga ai. Shi a shawng na hpyen Jaubu Maung Maung Shwe hpe gaw mailung hpaga hte ja htu hpaga hta nsun n ang ai hku galaw nna up hkang lam shut shai ai mara tam mu ai majaw 2005 ning August shata htum maga de htawt kau sai rai na ai. (Global Witness Interviews, September-October 2005, January 2006).
(6) 2005 ning October shata shapraw ai Global Witness report "A Choice for China'' hta gaw Miwa Asuya hte Myen Asuya lahkawng maga hku nna ndai mungdan lahkawng a lapran e n tara ai hpun hpaga n nga ai lam ning dang da ma ai. (Sources: 'Logging Cos Said Fleecing Myanmar Forest,' Assocaited Press; London Embassy of the Government of Myanmar, 19 October 2005).
(7) 2005 ning November shata hta Miwa Asuya hte Myen Asuya gaw tara n shang ai mailung hpaga hpe jahkring kau na matu myithkrum masat "Memorandum of Understanding'' ngu ai shada chye na hkat ai ta masat jawm ka mahkret da ma ai. Raitim, ndai myithkrum masat ai lam a kata lam azin ayang hpe mung shawa masha ni kaw matut ndau shana ai lam n nga ai. (New Light of Myanmar, 27 November 2005, hte Yunnan Daily, 25 November 2005).
2005 ning November shata St. Petersburg mare e galaw ai dai buga ginra na hpung ni hpe tara n shang ai hku jahten ai mara hte seng ai zuphpawng "Europe an North Asia Forest Law Enforcement and Governance (ENA FLEG) zuphpawng de Miwa mung Nam Kawn Dap (Chinese State Forestry Administration, SFA) mung sa lawm ma ai. Tara n shang ai hku hpun maling ni hpe mailung kran ai hpaga bungli shamat kau na bawngban ai zuphpawng de Miwa mungdan Asuya sa du lawm ai gaw n-gun lu na zawn raitim, Myen mung kata na bai shabai la nmai, malai kapa nmai ai hpung maling ni kran jahten shama ai mailung hpaga hpe pat hkum kau lu na matu, Miwa Asuya du ni hku nna tatut hpa matut galaw wa ai lam mung n mu lu ai.